1209
LO FUÈC E LO FÈRRE
LE FEU ET LE FER

 
1209-2009 : ja vuèch siècles !
Lo 22 de julhet dau 1209, li tropas crosadi intràvon dins Besiers e massacràvon la populacion. L’Istòria de França si garda ben de l’ensenhar ai enfants, tant es vèr que la barbaria non pòu èstre francesa !
En aqueu triste anniversari, Reinat TOSCANO nos prepaua aquesti poesias, coma un crit mandat ai sieus contemporaneus tant coma ai generacions futuri, per non denembrar
1209-2009 : déjà huit siècles !
Le 22 juillet 1209, les troupes croisées entraient dans Béziers et massacraient la population. L’Histoire de France se garde bien de l’enseigner aux enfants, tant il est vrai que la barbarie ne peut pas être française !
En ce triste anniversaire, Reinat TOSCANO nous propose ces poèmes, comme un cri envoyé à ses contemporains autant qu’aux générations futures, pour ne pas oublier.
ROÏNAS

Camini
Per li carrieras eternament silencioï
D’Orador,
Dont lo fuèc e lo fèrre
En aqueu 10 de junh dau 1944
Arrestèron la vida
Dins lo fracàs absurde de la guèrra
E de la folia
Dei òmes.

Aquí lo temps sembla refudar
D’arroïnar de mai li vièlhi pèiras,
D’amudir lo sovenir
Que ti ponhe lo coar e l’ànima
À cada pas que fas
Dins la pòuvera dolenta de la sofrença,
Dins aqueu silenci
Que ti parla
À foarça de t’estrénher
Lo coar e lu budeus…

Ieu camini dins aqueu vilatge
Coma tant d’autres
Que van
Reculhits e pensierós
Dins lo silenci
De la memòria fedela.
 
Camini
Mut d’esglai
E de vergonha per l’èstre uman
Davant la malòbra funèsta
D’aquelu sauvatges
Que non s’ameríton
Lo nom d’òmes.

Alora lo mieu esperit revirat
S’escapa en là dau temps
Vèrs lo tomp escur
D’un passat de làgrimas e de torments.

M’en vau vèrs lo trebolici
De l’Atge Mejan,
À l’auba dau siècle XIII,
Dont mi poarta lo sovenir
De cendre e de sang.

E pensi ai moarts
D’aqueu mes de julhet dau 1209
À Besiers.

Doi luècs,
Doi glèias,
Doi temps,
Una barbaria…

Li roïnas poàrton en eli
Lo recòrd amar
De toi lu chaples passats,
Fins à Sebreniza
E au Tibet…

Lo chaple coma exemple…
Exemple de que ?
Exemple de chaple
E d’inumanitat,
Moart semenada
À far levar la moart,
Ren d’autre que la moart,
À marcar de desgust
Li gents d’un país
Per l’eternitat.

Lo sang versat
Aiga li flors de l’òdi
Que s’espandísson
Fins à degalhar lo jardin
Que devèn pèira e pòuvera
Per sempre…

Que vèngon d’aquí ò d’aià,
Lu cendres son pariers,
Vènon d’un meme fuèc
Pudent e vergonhós,
E li roïnas soleti
Conóisson lo tot
Dei mieus pensiers.

SOBRAN DE LA PAGINA
LIBRES
QUESTIONS DE LENGA
BIOGRAFIA
PER LEGIR
DIVÈRS

ACUÈLH