Scena: lo salon, mé de pòrtas que dónon sus doás chambras, l'entrada e la cosina.

Lei personatges:
1) Victor: lo domestic. Es eu lo centre de la comèdia.
2) Jòrgi BADALUC: lo mèstre de l'ostau, una quarantena d'ans.
3) Carlin PITALUGA: negociant, la quarantena.
4) Albertina BADALUC: esposa de Jòrgi.
5) Matilda PITALUGA: esposa de Carlin.
6) Mèstre Joan FIGUIERA : notari.
7) Margarida CORNILHON: rèire-tanta. d'Albertina (lo ròtle pòu eventualament èstre atribuit àun òme)
8) Miqueu LESTACA: un galant d'Albertina à passat-temps.
9) Àngel GUERIN: parier.

Ange: Moussù.
Miqueu: Moussù.
Ange: (A despart) Qu serà?
Miqueu: (A despart) Qu diau serà?
Ange: (A despart) Veirèm ben...
          (A Miqueu, timidamèn) Asperatz quaucun?
Miqueu: (Un pauc embarassat) Iéu?... Hem!... Siéu aquì per un afaire que... enfin... un afaire!
          (A despart) Ma qu serà? Es entrat sensa sounà...
Ange: (Si va setà) Fa lountèmp qu'asperatz?
Miqueu: Noun, veni just d'arribà.
          (A despart) Vourrii ben saupre qu es...
Ange: Avètz pas vist degun?
Miqueu: Noun, degun.
Ange: Aloura, siatz aquì per afaire?
Miqueu: Ahì, per afaire.
Ange: Per afaire. ben, ben.
          (Regarja Miqueu un moumèn, pi repilha) E, sensa estre indiscret, si pourìa saupre de que afaire si trata?
Miqueu: Es un afaire... couma dire?...
Ange: Véhi cen qu'es: afaire segret. va ben. N'en vouòli pas saupre de mai
          (A despart) Après tout, pòu ben faire cen que vòu! Iéu,cen que n'en dihìi, era basta per parlà...
Miqueu: (A despart) Tantoutun, li aurìi pas ren dich...
          (Un moument de silenci. Degun auja parlà. Pi, à-n-un moumèn que Miqueu a l'esquina virada, Ange repilha) E ben iéu...
Miqueu: (Que si revira, sourprés) Ah, siatz vous? M'avètz fach paur!...
Ange: Iéu? V'ai fach paur? (Si ri) Venètz-vous setà proch de iéu, e vous dirai quaucarèn. Quaucarèn que vous farà ben rire...
          (Miqueu si ven setà)
          Se sabètz gardà un segret, naturalamèn...
Miqueu: Acò poudètz cuntà soubre de iéu: cen que mi dirètz aquì resterà entre nautre.
Ange: Vous demandatz bessai perqué siéu aquì...
Miqueu: Avètz bessai finda vous un afaire da reglà...
Ange: Un afaire, propi. Siéu vengut vèire quaucun. Vous que siatz pas de la maioun, vous pouòdi parlà lieuramèn. Lou mestre, aquì, lou noumat Jòrgi Badaluc, si cres d'estre maridat embé una frema fedela, ma saup pas, lou paure estaci, que la siéu frema es un pauc... laugiera...
Miqueu: (A despart) Couma se lou saupessi pas...
Ange... Quoura dihi "laugiera", esageri un pauc, perqué a pas gaire augut d'amant dins la siéu vida. En realità, n'a augut un solet: Ange Guerin, aquì present.
          (Miqueu si mete à tuèisse)
En mi laissant, m'a jurat qu'eri estat lou proumié e que serìi lou darrié.
          (Miqueu tuèisse encara)
Ah, de frema ensinda! Se saupessiatz!
Miqueu: Vous capissi...
Ange: Noun, noun, mi poudètz pas capì. Per mi capì, caurìa avé counouissut Albertina couma iéu l'ai counouissuda. Ma acò, lou v'ai ja dich, es pas poussible...
Miqueu (A despart) Se saupesse!
Ange: Siéu estat un òme urous: pendènt quauque mes, siéu vengut aquì cada dimecre. (Fa sinhe à Miqueu de s'aprouchà en li faguènt capì qu'a quaucarèn de mai segret da li dire. Parla plus bas). Madama Badaluc fahìa crèire au siéu ome que devìa anà s'oucupà sabi plus de quala assouciacioun, e mi venìa retrouvà aquì. E m'avìa finda dounat la clau de maioun. Regarjatz. (Li fa vèire la clau) Vehètz couma mi voulìa ben! Albertina!... Que frema! Poudètz pas saupre!
Miqueu: E cresètz ben que lou regreti!
          (A despart) E iéu que cresìi finda d'estre lou soulet ome de la siéu vida!...
(...)